FAQs – Regolamenti tal-2024 dwar Tibdil jew Tneħħija ta’ Kondizzjoni Imposta f’Kuntratt ta’ Proprjetà  li  kienet  Trasferita  mill-Gvern,  l-Awtorità tal-Artijiet jew Entitajiet Ekklesjastiċi permezz ta’ Bejgħ jew Enfitewsi.

Avviz Legali 196 tal-2024 – 23 ta’ Awwissu 2024

 

Min jikkwalifika ghall din l-iSkema?

Kwalunkwe persuna li għandha titolu ta’ akkwist permezz ta’ att pubbliku, jew enfitewsi fuq proprjetà li tkun għaddiet lill-applikant mill-Gvern jew l-Awtorità, jew minn enti ekklesjastiku, li sussegwentament għadda  t-titolu  lill-Gvern,  kemm jekk ġiet reġistrata f’isem il-Gvern jew għandha tiġi reġistrata f’isem il-Gvern, tista’,  għajr  għal  dak  li  previst  fid-dispożizzjonijiet l-oħra ta’ dawn ir-regolamenti, titlob lill-Awtorità li tbiddel jew tneħħi kondizzjoni imposta fil-kuntratt oriġinali:

Iżda kwalunkwe bidla u,jew rexxissjoni tal-kondizzjoni tista’ biss issir wara l-aċċettazzjoni bil-miktub ta’ tali bidla mill-Awtorità;

Iżda wkoll li l-ebda bidla  jew it-tneħħija ta’ kondizzjoni ma għandha tkun permissibbli għal kondizzjonijiet ewlenin ta’ kwalunkwe kuntratt;

Iżda wkoll li l-parti li tkun akkwistat art tal-gvern permezz ta’ kuntratt li jirriżulta minn reżoluzzjoni Parlamentari, jew minn tender, jew minn proċeduri ta’ tender, jew minn irkant ma għandux ikun eleġibbli sabiex japplika skont dawn ir-regolamenti.

Min hu eligibbli sabiex japplika taht din l-iSkema?

L-applikant għandu jkun  rikonoxxut  mill-Awtorità  bħala  sid  jew  iċ-ċenswalist tal-art jew tal-bini: iżda fil-każ ta’ enfitewsi,  l-applikant għandu jagħti  prova  li  ma  hemmx arretrati ta’ ħlasijiet ta’ ċens dovuti lill-Awtorità fuq il-proprjetà li  dwarha  tiġi  sottomessa  l-applikazzjoni  skont  dawn  ir-regolamenti.

X’inhuma d-drittijiet relatati ma zoni li ma jaqbzux l-1,500m2?

Id-drittijiet relatati ma’ siti b’kejl li ma jaqbiżx l-elf u ħames mitt metru kwadru (1,500m2) huma ndikati fis-sussewgwenti skeda:

Impronta	1m² – 300m²	301m² – 600m²	601m² – 900m²	901m² – 1200m²	1201m² – 1500m²
Bidla jew tneħħija ta’ kondizzjoni minuri*	€2,500	€5,000	€7,500	€10,000	€12,500
Bidla jew tneħħija ta’ kondizzjoni medja*	€5,000	€10,000	€15,000	€20,000	€25,000
Bidla jew tneħħija ta’ kondizzjoni maġġuri*	€10,000	€20,000	€30,000	€40,000	€50,000

 

X’inhuma d-drittijiet relatati ma zoni li jaqbzu l-1,500m2?

Il-valur għat-tneħħija ta’ kondizzjoni relatati ma’ siti b’kejl li jaqbeż l-elf u ħames mitt metru kwadru (1,500m2) għandu jkun stabbilit minn Perit maħtur mill-Awtorità, liema stima għandha ssir skont l-artikolu 79 tal-Att u għandha tirrifletti l-valur frank u ħieles tal-art fil-jum tal-applikazzjoni, fejn l-ispejjeż kollha relatati mal-valutazzjoni għandhom jiġu kkalkulati skont l-artikolu 79(5) tal-Att u għandhom jiġu mġarrba mill-applikant.

L-ammont pagabbli mill-applikant għat-tneħħija ta’ kondizzjoni ta’ livell ta’ importanza minuri kif determinat mill-Awtorità għandu jkun ekwivalenti għal tnejn punt ħamsa fil-mija (2.5%) tal-valur determinat mill-Perit, iżda qatt ma jista’ jkun inqas minn tnax-il elf u ħames mitt euro (€12,500):

L-ammont pagabbli mill-applikant għat-tneħħija ta’ kondizzjoni ta’ livell ta’ importanza medja kif determinat mill-Awtorità għandu jkun ekwivalenti għal ħamsa fil-mija (5%) tal-valur determinat mill-Perit, iżda qatt ma jista’ jkun inqas minn ħamsa u għoxrin elf euro (€25,000):

L-ammont pagabbli mill-applikant għat-tneħħija ta’ kundizzjoni ta’ livell ta’ importanza maġġuri kif determinat mill-Awtorità għandu jkun ekwivalenti għal għaxra fil-mija (10%) tal-valur determinat mill-Perit, iżda qatt ma jista’ jkun inqas minn ħamsin elf euro (€50,000):

X’ser jigri f’kaz ta kondizzjoni rilevanti li diga’ qeghda tinkiser?

Jekk waqt il-verifika tal-applikazzjoni, il-kondizzjoni rilevanti jirriżulta li diġà qegħda tiġi miksura, l-applikant għandu jeħel penali amministrativa li għandha tkun ekwivalenti għal ħamsa u għoxrin fil-mija (25%) tal-valur determinat fl-iskeda u l-hlasijiet deskritti hawn fuq.

Fil-kaz ta’ applikazzjoni li s-sit in kwistjoni jifforma parti minn sit b’iktar minn sid wiehed, l-applikant ser jigi mitlub ihallas il-penali kollha?

Fic-cirkostanzi li applikazzjoni għat-tneħħija ta’ kondizzjoni titressaq minn sid u/jew ċenswalist rikonoxxut ta’ unità, li tifforma parti minn żvilupp eżistenti ta’ bini b’ħafna sulari li nbena fuq sit li huwa marbut b’kondizzjoni kuntrattwali speċifika, l-Awtorità għandha titlob ħlas mill-applikant f’ammont ekwivalenti għas-somma totali pagabbli kif maqsuma bin-numru ta’ unitajiet mibnija fuqha fil-jum tal-applikazzjoni.

Hemm xi hlas dovut ma’ kull applikazzjoni li tigi sottomessa lill-Awtorita’ tal-Artijiet?

Ma’ kull applikazzjoni għandu jsir ħlas fl-ammont ta’ ħames mitt euro (€500) onlajn waqt il-process ta sottomissjoni.